रास्वपाले बालेन शाहको नाम प्रधानमन्त्रीको दाबेदारका रूपमा अघि सारेपछि देशभर पार्टीप्रति आकर्षण बढ्दै गएको दाबी गर्दै उम्मेदवार चौरसियाले त्यसको प्रभाव पर्सा-३ मा समेत देखिन थालेको बताएका छन्। बिहानैदेखि बड्का झौवा, छोट्का झौवा, इटियाही लगायतका बस्तीहरूमा मतदातासँग प्रत्यक्ष भेटघाट गरिएको जनाइएको छ।
घरदैलोका क्रममा चौरसियाले रास्वपाको नीति, सुशासन, रोजगारी सिर्जना, शिक्षा सुधार तथा भ्रष्टाचार नियन्त्रणसम्बन्धी प्रतिबद्धताबारे जानकारी गराएका थिए। स्थानीय समस्याहरू सुन्दै संसद्मार्फत समाधानका लागि पहल गर्ने प्रतिबद्धता उनले व्यक्त गरे।
अभियानमा सहभागी कौशल साहले देशमा देखिएको राजनीतिक विकृति अन्त्य गर्न नयाँ सोच र इमानदार नेतृत्व आवश्यक रहेको धारणा राख्दै त्यसका लागि रास्वपा उपयुक्त विकल्प भएको बताए। जनताको विश्वास र साथले मात्र वास्तविक परिवर्तन सम्भव हुने उनको भनाइ थियो।
यसअघि पर्साको दोस्रो सदरमुकामका रूपमा चिनिने पोखरियामा जेन-जी युवासहित तीन सयभन्दा बढी व्यक्ति रास्वपामा प्रवेश गरेको उल्लेख गर्दै स्थानीय स्रोतले युवाहरूको बढ्दो आकर्षणले पर्सा-३ मा पार्टीको आधार बलियो बन्दै गएको बताएका छन्।
उम्मेदवार चौरसियाका अनुसार परम्परागत राजनीतिबाट आजित मतदाता परिवर्तनको आशासहित रास्वपामा आबद्ध भइरहेका छन्। घरदैलोका क्रममा मतदाताहरूले आगामी प्रतिनिधिसभा निर्वाचनमा घण्टी चुनाव चिन्हमा मतदान गरेर परिवर्तनको सुरुआत गर्न चाहेको प्रतिक्रिया दिएको उनले बताए।
घरदैलो तथा जनसम्पर्क कार्यक्रममा स्थानीय नेता, कार्यकर्ता, युवा, महिला तथा समर्थकहरूको उल्लेख्य उपस्थिति रहेको थियो।
COMMENTS