वीरगञ्जको रेल्वे रोडस्थित एसबी ट्रेडिङ (SB Trading) मा वडा प्रहरी कार्यालय बिर्ताबाट खटिएको प्रहरी टोलीले छापा मारी करिब २५ लाखदेखि ३० लाख रुपैयाँ बराबरका विभिन्न सामान बरामद गरेको छ।
आइतबार साँझ करिब ५:३० बजे वडा प्रहरी कार्यालय बिर्ताका प्रमुख प्रहरी निरीक्षक बिक्रम सुबेदीको नेतृत्वमा गएको प्रहरी टोलीले उक्त पसलमा छापा मारेको हो।
छापाका क्रममा चिनियाँ, भारतीय तथा विभिन्न घरेलु प्रयोजनका सामानहरू अवैध रूपमा भण्डारण तथा बिक्री वितरण भइरहेको आशंकामा नियन्त्रणमा लिइएको प्रहरी निरीक्षक सुबेदीले देश मधेश अनलाइनलाई जानकारी दिनुभएको छ।
बरामद गरिएका सामानहरूमा भन्सार छली ल्याइएका हुन सक्ने विभिन्न उपभोग्य सामग्री, घरेलु सामान तथा अन्य वस्तुहरू रहेका छन्। प्रारम्भिक अनुमान अनुसार ती सामानहरूको बजार मूल्य करिब २५ लाखदेखि ३० लाख रुपैयाँ बराबर रहेको बताइएको छ।
हाल बरामद सामानहरू वडा प्रहरी कार्यालय बिर्ताको नियन्त्रणमा राखिएको छ भने घटनाबारे थप अनुसन्धान भइरहेको प्रहरीले जनाएको छ। आवश्यक कागजात नपुगेको अवस्थामा कानुनी प्रक्रिया अघि बढाइने र सम्बन्धित निकायसँग समन्वय गरी थप कारबाही गरिने प्रहरीको भनाइ छ।
यस घटनाले वीरगञ्ज क्षेत्रमा अवैध कारोबार नियन्त्रणका लागि प्रहरी सक्रिय रूपमा लागेको संकेत दिएको स्थानीयवासीहरूले बताएका छन्।
COMMENTS