जेनजी आन्दोलनमा दमन गरेको आरोपमा शनिबार पक्राउ परेका पूर्वप्रधानमन्त्री तथा एमाले अध्यक्ष केपी शर्मा ओली र पूर्वगृहमन्त्री तथा कांग्रेस नेता रमेश लेखक लाई आज काठमाडौं जिल्ला अदालत लगिँदै छ।
शनिबार सार्वजनिक बिदा परेकाले दुवै नेतालाई अदालत उपस्थित गराइएको थिएन। आज भने अदालत खुलेसँगै उनीहरूलाई उपस्थित गराइने प्रहरीले जनाएको छ।
गत भदौ २३-२४ गते जेनजी पुस्ताको प्रदर्शन हिंसात्मक बन्दा तीन जना प्रहरीसहित ७६ जनाको मृत्यु भएको थियो भने दुई हजार चार सयभन्दा बढी प्रदर्शनकारी गम्भीर घाइते भएका थिए। उक्त प्रदर्शनका क्रममा सिंहदरबार, संसद् भवन, सर्वोच्च अदालत, राष्ट्रपति भवन, प्रहरी कार्यालय, व्यापारिक प्रतिष्ठान तथा निजी निवासहरूमा आगजनी, तोडफोड र लुटपाट समेत भएको थियो।
घटनाको छानबिनका लागि गठन गरिएको गौरीबहादुर कार्की नेतृत्वको आयोगले तत्कालीन प्रधानमन्त्री ओली, तत्कालीन गृहमन्त्री लेखकसहित जिम्मेवार पदमा रहेका व्यक्तिहरूलाई दोषी ठहर गर्दै कारबाही सिफारिस गरेको थियो।
गत फागुन २१ गते सम्पन्न प्रतिनिधि सभा निर्वाचनपछि चैत १३ गते गठन भएको बालेन्द्र शाह नेतृत्वको सरकारले पहिलो मन्त्रिपरिषद् बैठकबाट उक्त प्रतिवेदन तत्काल कार्यान्वयन गर्ने निर्णय गरेको थियो। त्यसपछि चैत १४ गते बिहानै प्रहरीले ओलीलाई भक्तपुरको गुण्डुस्थित निवासबाट र लेखकलाई कटुन्जेस्थित निवासबाट नियन्त्रणमा लिएको थियो।
नियन्त्रणमा लिएपछि ओलीलाई स्वास्थ्य परीक्षणका लागि त्रिवि शिक्षण अस्पताल लगिएको थियो, जहाँ डाक्टरको सल्लाह अनुसार उनी हाल भर्ना छन्। लेखकलाई भने महाराजगञ्जस्थित प्रहरीको दुई नम्बर गणमा राखिएको छ।
आज अदालत खुलेसँगै दुवै नेतालाई उपस्थित गराउने तयारी भइरहेको प्रहरीले जनाएको छ।
COMMENTS