बारामा पछिल्लो केही दिनयता प्रशासनले बजार अनुगमनलाई तीव्र बनाएको छ । बुधबार जिल्ला प्रशासन कार्यालय बाराको अगुवाइमा गरिएको संयुक्त बजार अनुगमनका क्रममा मापदण्ड विपरीत सञ्चालन भएका विभिन्न व्यवसायिक फर्महरूलाई कुल १ लाख ५ हजार रुपैयाँ जरिवाना गरिएको छ।
जिल्ला प्रशासन कार्यालय, घरेलु तथा साना उद्योग कार्यालय, वाणिज्य आपूर्ति तथा उपभोक्ता संरक्षण कार्यालय वीरगञ्ज, गुणस्तर तथा नापतौल कार्यालय, खाद्य प्रविधि तथा गुण नियन्त्रण कार्यालय, इलाका प्रहरी कार्यालय कोल्हवी तथा उपभोक्ता हित संरक्षण मञ्चको संयुक्त टोलीले कोल्हवी र महागढीमाई क्षेत्रमा अनुगमन गरेको हो।
अनुगमनका क्रममा उपभोक्ता संरक्षण ऐन २०७५ उल्लंघन गर्ने ६ वटा फर्ममध्ये ४ वटालाई नगद जरिवाना गरिएको प्रशासनले जनाएको छ। महागढीमाई-१ स्थित मुस्कान डेरी उद्योगलाई ऐनको दफा ३८ को खण्ड (ट) अनुसार कसुर गरेको पाइएपछि सबैभन्दा बढी ७५ हजार रुपैयाँ जरिवाना गरिएको छ।
त्यसैगरी कोल्हवी-२ मा रहेको हाम्रो फ्रेस चाउमिन उद्योगलाई खाद्य क्षेत्रको नियमित अनुगमनका क्रममा ऐनको दफा ३८ (घ) अनुसारको कसुर देखिएपछि २० हजार रुपैयाँ जरिवाना गरिएको छ। कोल्हवी-१ स्थित न्यू जैशवाल मिष्ठान भण्डारलाई ५ हजार तथा कोल्हवी-३ मा रहेको वैष्णाव होटललाई पनि ५ हजार रुपैयाँ जरिवाना गरिएको प्रशासनले जनाएको छ।
यता कोल्हवी-१ मा सञ्चालित शिवम ट्रेडर्स र आयुष ज्वेलर्समा गरिएको अनुगमनमा भने आवश्यक मापदण्ड पालना गरिएको पाइएको छ। ती फर्मलाई सामान्य सुधारका लागि निर्देशन दिँदै छाडिएको अनुगमन टोलीले जनाएको छ।
प्रशासनले उपभोक्ताको स्वास्थ्य र अधिकारलाई प्राथमिकतामा राख्दै आगामी दिनमा पनि बजार अनुगमनलाई निरन्तरता दिने जनाएको छ।
COMMENTS