सिमराकी तीन वर्षीया बालिकाको अपहरण, जबरजस्ती करणी तथा हत्या प्रकरणमा मुख्य प्रतिवादीका रूपमा अभियोग लगाइएका प्रोग्रेश भन्ने पुरग्रेश चौधरीलाई बारा जिल्ला अदालतले २० हजार रुपैयाँ धरौटीमा रिहा गर्न आदेश दिएको छ।
बिहीबार न्यायाधीश प्रकाशकुमार अधिकारीको इजलासले चौधरीसँग २० हजार रुपैयाँ नगद धरौटी वा सो बराबरको जमानत तथा असिमित बैंक जमानत माग गर्दै मुद्दाको पुर्पक्षका लागि तारिखमा राख्ने आदेश दिएको हो। तोकिएको धरौटी वा जमानत दिन नसके कानुनबमोजिम थुनामा राख्न अदालतले आदेश दिएको छ।
अदालतले तत्काल प्राप्त प्रमाणबाट चौधरी अभियोगमा संलग्न छैनन् भन्न सकिने अवस्था नरहेको ठहर गरेको छ। जाहेरी, घटनास्थलसम्बन्धी कागजात, विभिन्न व्यक्तिले दिएको घटनाविवरण तथा बालिकाको शव बरामद भएको घरमा चौधरीले विद्युत् लाइन जडान गरेको स्वीकार गरेको विषयलाई अदालतले तत्काल प्राप्त प्रमाणका रूपमा लिएको छ।
तर, उपलब्ध प्रमाणका आधारमा चौधरीलाई तत्काल थुनामा राखेर मुद्दाको पुर्पक्ष गर्नुपर्ने अवस्था भने नदेखिएको अदालतको निष्कर्ष छ। थप प्रमाण बुझ्दै जाँदा कानुनबमोजिम हुने भन्दै उनलाई धरौटीमा तारिखमा राख्ने आदेश दिइएको हो।
प्रकरणमा अभियोग लागेका इन्द्रजीत चौधरी, बबिता चौधरी, ममता चौधरी, पुष्पा चौधरी, नविन वि.क., टेकबहादुर थापा मगर, शेष हस्मुदिन आलम, सविता चौधरी र बिन्दु देवी चौधरीलाई भने अदालतले साधारण तारिखमा राखेर मुद्दाको पुर्पक्ष गर्न आदेश दिएको छ।
उनीहरूले आरोपित कसूरमा इन्कार गर्दै बयान दिएका र मुख्य कसूरमा सहयोग गरेको वा प्रमाण लोप गरेको पुष्टि हुने तत्काल प्राप्त पर्याप्त प्रमाण मिसिलमा नदेखिएको भन्दै उनीहरूसँग धरौटीसमेत नमागिएको अदालतले जनाएको छ।
बालिकाको परिवारले भने विभिन्न प्रतिवादीको मिलेमतोमा बालिकालाई अपहरण गरी शरीर बन्धक बनाएर जबरजस्ती करणीपछि हत्या गरिएको आरोप लगाउँदै जाहेरी दिएको थियो।
अदालतले तत्काल प्राप्त प्रमाणका आधारमा प्रतिवादीहरूलाई फरक–फरक अवस्थामा राखेको भए पनि मुद्दाको अन्तिम फैसला भने थप प्रमाण र सुनुवाइपछि मात्रै हुने स्पष्ट गरेको छ।
यसैबीच, प्रकरणमा फरार रहेका प्रतिवादीहरूको हकमा कानुनबमोजिम म्याद जारी गरी आवश्यक कारबाही अघि बढाउनसमेत अदालतले आदेश दिएको छ।
COMMENTS